capar.info : - “Azərbaycan və müttəfiqlərinin təzyiqi artıq nəticə verməyə başlayıb. Bəyənatın şərtlərinə əməl edilir. Ağdərə istiqamətində erməni mövqelərinin boşaldılması prosesi digər ərazilərdə də davam edəcək”.

Bunu Ağdərə istiqamətində ermənilərin mövqelərindən çıxarılması, həmin yerlərə Rusiya sülhməramlılarının yerləşdirilməsi və bu prosesin digər istiqamətlərdə də aparılmasını şərh edən hərbi ekspret Tərlan Eyvazov Yenicag.az-a açıqlamasında deyib.

Tərlan Eyvazov öncə İranın davranışı və ona Azərbaycanın cavabına münasibət bildirərək, bunları deyib:

“Azərbaycan İran tərəfinə yük maşınlarının Qarabağa qeyri-qanuni keçməsi ilə bağlı xəbərdarlıq etməsinə baxmayaraq, İran öz ampulasında qalırdı. Bundan sonra Azərbaycan tərəfi Qubadlıda, Eyvazlı kəndində post qurdu və yoxlamalara başladı. Maraqlıdır ki, buna nə Rusiya, nə də Ermənistan ciddi müqavimət göstərmədi. İran tərəfi buna çox ciddi müqavimət göstərdi və Azərbaycanın üzərinə gəldi, məcbur etməyə çalışdı ki, Azərbaycan öz mövqeyindən geri çəkilsin, əvvəl olduğu kimi maşınları buraxsın. Azərbaycan geri addım atmadı. Azərbaycan, Türkiyə və Pakistanın Xüsusi Təyinatlı Qüvvələri “Üç Qardaş” adı altında planlaşdırılmış təlimlərə başladı. Buna cavab olaraq, İran da Azərbaycan sərhəddinə yaxın hərbi təlimlərə keçirdi. Budan dərhal sonra artıq planlaşdırılmamış Türkiyə Silahlı Qüvvələri ilə Azərbaycanın Naxçıvanda birgə təlimləri başladı. İranın ötən əsrin 70-ci illərindən qalmış texnikasına qarşı Naxçıvanda Azərbaycan və Türkiyənin müasir hərbi texnikası nümayiş etdirildi. Hazırkı müharibələr müasir texnologiyalarla aparılır. Azərbaycan və Türkiyənin birgə təlimləri İrana göstərdi ki, bu onun baş açacağı iş deyil. Bundan sonra dərhal İranın yumuşaldığını və geriyə çəkildiyinin şahidi olduq. Bəzi müşahidəçilərin fikrincə, Rusiyanın dəstəyi ilə İran Azərbaycanın üzərinə gəlirdi. Bu fikirdə deyiləm. İranın cığallığı ondan ibarət idi ki, məlum Zəngəzur dəhlizi açılmasın, əvvəl olduğu kimi yenə İran ərazisindən nəqliyyat dəhlizi keçsin. Məlum olduğu kimi Çin, İngiltərə, Rusiya və Türkiyə Zəngəzur dəhlizinin açılmasında maraqlıdır”.

Rusiya sülhməramlılarının uzun zaman sonra erməni tərəfini tutduğu mövqelərdən çıxarmasını isə hərbi ekspret belə şərh edib:

“Hazırda baş verən proses ötən ilin məlum üçtərəfli bəyanatdan bir ilə yaxın vaxt keçməsinə baxmayaraq, yerinə yetirilmirdi. İstər müxalifət, istər hakimiyyəti tənqid edənlər tərəfindən daim gündəmdə saxlanılırdı ki, bu bəyanatın şərtləri niyə yerinə yetirilmir? Görünən odur ki, Azərbaycan tərəfi dayanmayıb, diplomatik, siyasi təzyiqlər edib və indi nəticəsini görürük. İranla olan məsələdə Pakistan da mövqeyini ortaya qoydu. Rüstəm Muradovun yerinə gələn general 10 gün sonra dəyişdirildi. Kosobokov Sülhməramlılara komandan təyin ediləndən dərhal sonra Ermənistana gedib, erməni siyasi və hərbi rəhbərliyi ilə görüş keçirmişdi. Təbii ki, Azərbaycan buna səssiz qala bilməzdi. Onun vəzifədən getməsinin səbəbi Azərbaycanın təzyiqinin nəticəsi idi. Bu Azərbaycan tərəfinin böyük uğurudur. Ötən ilki savaşdan sonra nəinki məğlub tərəf, qalib gələn tərəfin də arsenalında boşalmalar olub, müəyyən texinakalar sıradan çıxıb. Azərbaycan öz arsenalını yeniləmək üçün Türkiyədən və İsraildən silahlar almağa başladı. Bir il müddətində silahlanmamızda məxsusi yeri olan Rusiyadan bir mərmi belə almadıq. Bu özü də, Rusiya tərəfinə Azərbaycanın bir etiraz mesajı idi. Bildiyimiz kimi, Rusiya dövlətinin ayaqda qalması üçün silah sənayesi çox önəmlidir. Azərbaycan uzun illərdir ki, Rusiyadan silah alır və çox yaxşı bir alıcıdır. Bir neçə gün öncə prezident İlham Əliyev İqor Korotçenkoya müsahibəsində Rusiyadan silah almaq üçün danışıqlar aparıldığını açıqladı. Bu da onun nəticəsində baş verir ki, Azərbaycan tərəfi Rusiyadan silah almadı, müttəfiqləri ilə birgə təzyiqlər etdi. Çox güman ki, Ağdərə və digər yerlərdə erməni silahlıları çıxarıldıqdan sonra qaçqınların geri qaytarılması şansı yaranır və tezliklə biz bunun şahidi olacağıq. O ərazilərdə də minalardan təmizləmə və yolların çəkilməsi baş verəcək. Təkcə Ağdərə yox, Xocavənd, Xocalı, Şuşa ətrafında da ermənilərin postları ləğv ediləcək.

Azərbaycan Rusiya ilə nə müttəfiq, nə də düşmən deyil. Rusiyanın adalandırdığı kimi strateji müttəfiqik. Rusiyaya kəskin etiraz edib, müharibə şəraiti yaratmaq Azərbaycanın xeyrinə olmaz. Müharibədən təzə çıxmışıq. O məsələləri ki, diplomatik, ticarət və pulla həll etmək olar, Azərbaycan bunu etməlidir. Nə qədər təzyiq mümkündürsə, o qədər etmək lazımdır. Təzyiqi həddən artıq edərsənsə, nəticəsi ağır olar.

Bəli Azərbaycanın çox güclü müttəfiqləri var. Ancaq müttəfiqlərə güvənib, ərazisini müharibə meydanına, poliqona çevirməli deyil. Azərbaycana inkişaf, qaçqınları öz torpaqlarına qaytarmaq lazımdır. Müharibə yolu ilə nə lazımdırsa edildi, indi yol diplomatlarındır”.

Bütün bu uğurlu nəticələrlə yanaşı neqativ halların da mövcud olduğunu deyən Tərlan Eyvazov qeyd edib ki, bəzi məmurları ölkədə qarışıqlıq yaratmaq niyyətindədir:

“Əlillərin çox ciddi problemi yaranıb. Hazırda elə vəziyyət mövcutdur ki, şikayət ediləcək qurum belə yoxdur. Qurumlar problemi öz üstündən atmaqla məşğuldur. Zabitə əlil olması ilə bağlı sənəd verilib, ƏƏSMN bunu qəbul etmir, zabit o zaman sağlamlıq haqqında kağız istəyir ki, gedib xidmət etsin, onu belə vermirlər. Çox absurd durumla qarşı-qarşıyayıq. Ölkədə çox ciddi bahalaşma dalğası var. Ancaq bunun qarşısının alınması üçün heç bir addım atılmır. Düşünürəm ki, bu digər uğurlara kölgə salır. İnsanlar qələbəyə ürəkdən sevinə bilmir”.