capar.info : -İran Azərbaycan və Türkiyə hərbçilərinin Xəzərdə keçirdiyi təlimlərdən ciddi narahat olub.

Bununla bağlı İran Xarici İşlər Nazirliyi rəsmi açıqlama yayaraq, Türkiyə hərbçilərinin Xəzərdə olmasını qanunsuz adlandırıb. Qeyd edək ki, təlim Xəzər dənizinin Azərbaycan ərazi sularında keçirilir. Bu təlimlər isə İranda ciddi narahatlıq yaradıb. Amma İran öz ərazisindən Qarabağda olan separatçılara yardım aparan naməlum yük maşınlarından narahat olmur. Xatırladaq ki, İran maşınlarının Qarabağda olan separatçılara yanacaq, silah-sursat və digər hərbi ləvazimatlar aparması ilə bağlı sosial şəbəkələrdə videolar yayılıb. Azərbaycan tərəfi bu məsələ ilə bağlı İrana rəsmi xəbərdarlıq edərək nota verib.

Məsələ ilə bağlı Cebhe.info-ya açıqlamasında Azərbaycan Milli İstiqlal Partiyasının (AMİP) sədri Arzuxan Əlizadə deyib ki, İran son 30 il ərzində, Azərbaycan torpaqları işğal altında olduğu müddətdə şərti olaraq bizə “din qardaşları” deməsinə baxmayaraq, yanımızda olmayıb:

“Bu illər ərzində hər vasitə ilə İran düşmən Ermənistana dəstək verməkdə davam edib. Müharibə dönəmində də, bundan əvvəl də gördük ki, Rusiyadan Ermənistana gedən silahlar İran üzərindən aparılır. Müharibədən sonrakı dönəmdə də müşahadə edirik ki, İrandan Azərbaycan torpaqlarında olan separatçılara yardım gəlir. Həmin maşınlarda yanacaq, silah daşındığı ehtimal olunur. Azərbaycan bir müddət əvvəl bu məsələ ilə bağlı İrana nota verdi.

Bir ay ərzində 35 maşın keçirdisə, notadan sonra 58 maşın keçib. Bu da onu göstərir ki, İran Azərbaycana dost münasibəti göstərmir və edilən iradlara da əks mövqe ilə cavab verir. İran daha çox bundan narahat olsun ki, Azərbaycanın suverenliyini, ərazi toxunulmazlığını pozaraq qanunsuz olaraq separatçılara silah-sursat, yanacaq daşıyır. Azərbaycanın Xəzərdə Türkiyə ilə birgə təlimlər keçirməsinə isə İranın narahatlığı heç bir halda başadüşülən deyil”.