Dekabr ayında SSRİ və Azərbaycanın Xalq artisti Zeynəb Xanlarovanın 90 yaşı tamam olacaq.

Capar.info -nın əldə etdiyi məlumatına görə, sənətkarın 90 illik yubileyi münasibətilə böyük tədbir keçiriləcək. İlkin məlumata görə, yubiley mərasiminin Heydər Əliyev Sarayında keçirilməsi planlaşdırılır.

Mərasimdə dövlət, elm və mədəniyyət xadimlərinin iştirakı gözlənilir.

.
Qeyd edək ki, SSRİ və Azərbaycanın Xalq artisti Zeynəb Xanlarova 1936-cı il dekabrın 28-də doğulub. Sənətçi , 1956-cı ildə M. Ə. Sabir adına Bakı Pedaqoji Məktəbini, 1961-ci ildə isə Asəf Zeynallı adına Bakı Musiqi Texnikumunu bitirib.

Xalq artisti 1961-ci ildən Opera və Balet Teatrının solisti kimi fəaliyyətə başlayıb. Üzeyir Hacıbəylinin "Leyli və Məcnun" və "Əsli və Kərəm" operalarında Leyli və Əsli obrazlarını yaradıb.

1985-1995-ci illərdə Azərbaycan SSR Ali Sovetinin XI və XII çağırış deputatı, 1995-2020-ci illərdə isə Azərbaycan Respublikası Milli Məclisinin I, II, III, IV və V çağırış deputatı olub.

Xalq artistinin repertuarında muğamlar, təsniflər, Azərbaycan xalq mahnıları, bəstəkar mahnıları və Şərq xalqlarının mahnıları geniş yer tutur.

Zeynəb Xanlarova Azərbaycanın qadın xanəndələri arasında "Çahargah" muğamının ilk ifaçılarından biri hesab olunur.

Onun haqqında "Salam, Zeynəb!" adlı sənədli televiziya filmi çəkilib.