2021-ci il fevral ayının 4-də səhər tezdən redaksiyamıza gözlənilmədən bir zəng daxil oldu. Zəng edən ağlayan bir qadın idi. Həmin qadın bizi təcili Binəqədi rayonu Sulutəpə qəsəbəsində sökülmüş evi çəkməyə dəvət edirdi. Həmin qadın şəhid bacısı idi. Onun oğlu Samir üçün tikmiş olduğu evi Binəqədi İcranın işçiləri söküb darmadağın etmişdilər. Biz öz çəkiliş qrupumuzla təcili həmin yerə gəldik və evin bütün materiallarının ekskavatorla dağıdıldığını gördük. Ev sahibinin dediyinə görə, yəni Vüqar Süleymanovu polislər məcbur qolunu burub saxlayıblar. Sonra evi uçurublar. Vətəndaşın dediyinə görə İcranın Səbuhi adlı işçisi onlardan 4 000 (dörd min) manat məbləğində pul istəmiş. Guya hansı hesaba isə köçürüb, sonra qəbz gətirəsi imiş. Vətəndaş isə 3 000 (üç min) manat vermiş, qalanı isə hal-hazırda pulumuz yoxdur demiş. Səbuhi isə aldığı 3 000 (üç min) manata qane olmadığı üçün evi uçurmaq üçün texnika çağırmış və uçurmuş, hətta sökdükdən sonra kubiklərdən bir kamaz yığıb harasa aparmışdır. Bütün bunlar bəs deyilmiş kimi hələ polis çağırıb, Vüqarı tutulacağı ilə hədələmiş, təhqir etmişdir.
Biz həmin vətəndaşın ərizəsini olduğu kimi dərc etməyi özümüzə borc bildik.

Xatırladırıq ki, binanı sökən qarşı tərəf çəkiliş qrupumuzu görən kimi suallarımıza münasibət bildirirək, cavab vermək əvəzinə öz xidməti maşınlarına minərək tələsik qaçdılar. Bizə isə yalnız onların şəklini çəkmək qaldı. Ətrafda yeni tikilən binalar olduğu halda niyə məhz Samir Süleymanovun evini sökdülər? Bu sualın cavabı isə hələ də qaranlıq qaldı…

Səadət İbrahimova,
“Bizim fakt” qəzetinin baş redaktoru