“Azərbaycanla Avrasiya İqtisadi İttifaqı arasında əməkdaşlıq ticarət əlaqələrinə, geniş infrastruktur layihələrinin həyata keçirilməsinə təkan verə bilər”.
Bunu Rusiya Xarici İşlər Nazirliyinin (XİN) sözçüsü Mariya Zaxarova Azərbaycanın sözügedən təşkilatda müşahidəçi status ala biləcəyi barədə Qazaxıstanın ilk prezidenti Nursultan Nazarbayevin fikirlərini şərh edərkən bildirib. “Azərbaycanla qurum arasında istənilən formatda dialoqun inkişaf etdirilməsi qarşılıqlı ticarət əlaqələrin artmasına, regiondakı nəqliyyat yollarının açılmasına, iri infrastruktur layihələrinin həyata keçirilməsinə səbəb ola bilər. Bununla belə, birlik çərçivəsində əməkdaşlıq səviyyəsinin artırılmasına dair qərarların bütün üzv dövlətlərin razılığı ilə verildiyi də nəzərə alınmalıdır”, - Zaxarova vurğulayıb.
Rusiya XİN nümayəndəsi, həmçinin təşkilatın inteqrasiya və əməkdaşlıq qurmaqda maraqlı olan dövlətlərin üzünə açıq olduğunu da əlavə edib. Qeyd edək ki, Azərbaycan iqtisadi əlaqələrin inkişafı, möhkəmlənməsi istiqamətində bir çox qurumlarla əməkdaşlıq edir.
Bəs ölkəmizin Avrasiya İqtisadi İttifaqı arasında əməkdaşlıq Azərbaycan üçün hansı imkanlar yarada bilər?
DİA.AZ xəbər verir ki, millət vəkili Azər Badamov “Cümhuriyət” qəzetinə bildirdi ki, Azərbaycan bütün təşkilatlarla, tərəfdaşlarla iqtisadi əlaqələrin genişləndirilməsində maraqlıdır: “O cümlədən, Avrasiya İttifaqına daxil olan ölkələrlə də əlaqələrin genişləndirilməsində maraqlıdır. Düşünürəm ki, iqtisadi əlaqələrin genişləndirilməsi, həm Azərbaycana, həm də tərəfdaşlıq edəcəyi ölkələrə iqtisadi mənfəətlər, dividentlər gətirəcək. İqtisadi əlaqələrin genişləndirilməsi indiki dövrdə ən vacib məsələlərdən biridir. Münasibətlərin daha çox formalaşması ölkəmizin iqtisadiyyatına daha çox öz təsirini göstərəcək. Yeni əlaqələr yeni yaranan fürsətlərdir. Hər bir əlaqənin yaranması yeni əməkdaşlıq mühitinin formalaşması deməkdir. Bu gün Azərbaycanda böyük quruculuq işləri aparılır. Həm işğaldan azad edilmiş ərazilərimiz yenidən qurulub bərpa olunur, investisiyalar yatırılmalıdır. Həm də Azərbaycan qeyri-neft məhsulları istehsal edir, bir çox çeşiddə məhsullar ölkəmizdə istehsal olunmağa başlanılıb. İqtisadi əlaqələrimizin genişlənməsi ixrac coğrafiyamızın genişlənməsinə imkan yaradacaq”.
İqtisadçı-ekspert Pərviz Heydərovun fikrincə, Azərbaycanın ümumilikdə götürdükdə hər bir ölkə ilə ikitərəfli iqtisadi, ticari münasibətləri var: “Azərbaycan regionda əməkdaşlığın, sülhün möhkəmlənməsinin tərəfdarı olduğunu hər zaman bəyan edib. Bu, hər zaman Azərbaycan tərəfdən eşidilib ki, regionda qarşılıqlı iqtisadi, ticarət əlaqələrinin olması bütün ölkələr, o cümlədən torpaqlarımızı işğal edən Ermənistan üçün də əlverişli olar, daha çox məfəət gətirə bilər. Son vaxtlar ən çox müzakirə obyekti isə Zəngəzur dəhlizi ilə əlaqədardır. Zəngəzur dəhlizi ən bəsit formada yanaşsaq, Azərbaycanın əsas ərazisi ilə Naxçıvan arasında əlaqə üçün vacib element kimi nəzərdən keçirilə bilər. Ancaq Azərbaycan tərəfi müharibədən sonra imzalanan kapitulyasiya sənədində bunu qeyd etməyə nail olmuşdu, sonradan Rusiya dövlət başçısı dəfələrlə bunu bəyan etdi ki, Zəngəzur dəhlizi yalnız Azərbaycanın digər bölgələrinin Naxçıvanla əlaqəsi demək deyil, bütövlükdə region ölkələri, o cümlədən Şimal-Cənub, Şərq-Qərb dəhlizi üçün də çox əlamətdar seqment sayılır. Onun reallaşacağı təqdirdə bütün regionlar, həm Asiya, həm də Avropa ölkələri qarşılıqlı şəkildə mənfəət götürə biləcəklər”.
Ekspert onu da vurğulayıb ki, Rusiya XİN sözçüsünün Azərbaycanın Avrasiya İqtisadi İttifaqı arasında əməkdaşlıq barədə münasibətlərinin hansı hədəfə xidmət etdiyini deyə bilməsə də, Azərbaycanın istər MDB, istərsə də Avropa İttifaqı daxilində sırf siyasi xarakter daşımayan iqtisadi birliklərlə hər zaman qarşılıqlı əlaqələri olub: “Azərbaycan hər zaman harada qarşılıqlı iqtisadi əlaqələr, ticari münasibətlərdən, faydalı əməkdaşlıqdan söhbət gedirsə, buna hazır olduğunu nümayiş etdirir. Hətta bu istiqamətdə təkbaşına bir çox mühüm strateji əhəmiyyət daşıyan layihələrin ideyaçısı olaraq çıxış edir. Kiçik dövlət olmasına baxmayaraq həmin layihələri təkbaşına reallaşdırıb. Buna Bakı-Tbilisi-Ceyhan neft-boru kəməri, Bakı-Tbilisi-Qars dəmir yolu, nəhayət, Cənub Qaz Dəhlizi üçün çox böyük əhəmiyyət kəsb edən strateji bir qaz layihəsi də aiddir. Hansı ki, bu layihənin özü gələcəkdə Transxəzər üçün böyük imkanlar açır, Avrasiya İttifaqının enerji resusrlarını dünya bazarlarına çıxarılması üçün alternativ imkanlar ortaya qoyur. Əslində Azərbaycanın istər Avrasiya İqtisadi İttifaqı, istərsə də bu ya digər qurumlarla olsun, bütün iqtisadi, ticari əlaqələr baxımından heç bir məhdudiyyəti yoxdur və hər zaman buna can atıb”.