capar.info : - “Son günlər Azərbaycan cəmiyyətində qədim Zəngəzur torpağımızdan Naxçıvana və Türkiyəyə keçən yolun açılışına nail olmaq üçün guya həmin dəhlizin keçdiyi hüquqi cəhətdən Ermənistana aid Meğri ərazisinin Azərbaycan Respublikasının Xankəndi şəhəri ilə dəyişdirilməsinin mümkünlüyü barədə fikirlər səslənir. Hətta bildiyimə görə, erməni saytları da bu iddianı tirajlamağa başlayıb. Həm 1-ci Qarabağ savaşında məhz Xankəndi, Şuşa ətrafındakı polis və ordu əməliyyatlarının, döyüşlərin iştirakçısı kimi, həm də sadəcə, o torpaqlarda ömrünün xeyli hissəsini yaşamış və o yurdlardan məcburi köçkün olan Azərbaycanın bir vətəndaşı kimi belə mülahizələrə qəti şəkildə etiraz edirəm. Bunlar ilk növbədə haqsız, ədalətsiz, həm də tamamilə məntiqsiz fikirlərdir”.

Bu sözləri Moderator.az-a açıqlamasında tanınmış Qarabağ qazisi, keçmiş tabor komandiri, ehtiyatda olan kəşfiyyatçı polkovnik Azay Kərimov səsləndirib.

“Əvvəla, heç kəs xalqla hesablaşmadan, müvafiq referendum, digər qanuni prosedurlar həyata keçirmədən Vətənin hansısa torpağını qonşu, özü də düşmən, işğalçı ölkənin torpağıyla dəyişə bilməz. İkincisi, unutmaq olmaz ki, Ali Baş Komandanın da dəfələrlə təkrar etdiyi kimi, Zəngəzur da, Meğri də digər Qərbi Azərbaycan əraziləri kimi bizim tarixi dədə-baba torpaqlarımızdır. Mən də bir sıra döyüşçü dost və zabit həmkarlarımın o fikrini dəstəkləyirəm ki, biz Azərbaycan xalqı, dövləti olaraq qəsbkar Ermənistanla sərhədlərimizin demarkasiya və delimitasiyasının sovet dövrünün xəritləri ilə deyil, 1918-1920-ci illərdəki 114 min kvadrat kilometrlik ərazisi olan müstəqil dövlətimizin, Azərbaycan Xalq Cümhuriyyətinin xəritələri üzrə aparmalıyıq. O halda artıq Zəngəzur dəhlizinə-filana ehtiyac qalmayacaq. Çünki həmin ərazi sovet Rusiyasının qanunsuz olaraq əlimizdən alaraq Ermənistana bağışladığı digər torpaqlarımız kimi Azərbaycan Respublikasının ərazisinə qatılacaq. Üçüncüsü, Xankəndini dəyişəcəyimiz halda gərək Şuşa rayonunun Xankəndinə yaxın Malıbəyli, Quşçular və s. kəndlərini, eləcə də Xankəndidən Ermənistana gedən yolun üzərindəki digər yaşayış məntəqələrimizi, həmçinin Laçın dəhlizi deyilən ərazini, yəni Laçın şəhəri və ətraf kəndləri də ermənilərə bağışlayaq. Özünüz düşünün, bu mümkündürmü? Azərbaycan xalqı, həmin torpaqların sakinləri buna razı olarmı? Və dördüncüsü, qanuni və tarixi Azərbaycan torpaqlarının hər qarışı bizim üçün əzizdir, gözəldir. Amma bir reallıq var. Gözəl mənzərəli Xankəndi və Şuşa-Laçın yolu hara, qupquru, çılpaq dağlı Meğri ərazisi hara? Şuşanın mənzərəsi gözəl olsa da, havası, suyu saf olsa da, dəniz səviyyəsindən 1700 metrə yaxın hündürlükdə yerləşdiyi üçün hər insan, xüsusən meteo-həssas insanlar orada yaşaya bilməz. Amma Xankəndinin, eləcə də yaxınlıqdakı Malıbəyli, Quşçular kəndlərinin iqlimi dağ və düzən iqlimi arasında dəyişdiyindən yaşayış üçün çox rahatdır. Niyə bizlər, Azərbaycan xalqı o rahat, gözəl yurdlarda yaşamayaq? Bütün deyilənləri təhlil edəndən sonra belə nəticəyə gəlirsən ki, Xankəndi ilə Meğrini dəyişmək saray ilə tövləni dəyişmək kimidir. Odur ki, bunu heç kəs heç ağlının ucundan da keçirməsin” –deyə Şuşa rayonunun Xankəndiyə bitişik Malıbəyli kəndindən məcburi köçkün olan kəşfiyyatçı polkovnik vurğulayıb.