Balakən rayonundan olan millət vəkili Nəsib Məhəməliyev avarların kompakt yaşadığı Qabaqçöl Qəsəbəsində yerli sakinlərlə görüş keçirmişdir. Deputatın vətəndaşlarla görüşündə Balakən rayon İcra Hakimiyyəti başçısının Qabaqçöl Qəsəbəsi üzrə İcra nümayəndəsi Cuma Xəlilov və Qabaqçöl Bələdiyyəsinin sədri Elman Süleymananov iştirak etmişdir.
Görüşü giriş sözü ilə açan millət vəkili Nəsib Məhəməliyev Azərbaycan Respublikasının prezidenti cənab İlham Əliyevin rəhbərliyi altında son dövrlər ölkəmizdə həyata keçirilən uğurlu siyasətin nəticəsində ölkədə hər sahədə yüksək inkişafın müşahidə olunduğunu bildirmişdir. Cənab prezidentin Balakənə son səfərini qeyd edən millət vəkili dövlət başçısının Balakənə hər zaman xüsusi diqqət göstərdiyini, balakənliləri narahat edən problemlərin qısa müddətdə cənab prezidentin diqqət və qayğısı nəticəsində həll olunduğunu bildirmişdir.
Ölkəmizin Birinci Vitse - Prezidenti Mehriban xanım Əliyevanın rəhbərlik etdiyi Heydər Əliyev Fondunun həyata keçirildiyi geniş lahiyələr barədə söz açan deputat Balakəndə önəmli lahiyələrin icra olunduğunu bildirmişdir.
Son zamanlarda qəsəbədə xarici qüvvələrin təxribatı ilə baş verən xoşagəlməz hadisələr barədə söz açan millət vəkili Nəsib Məhəməliyev avar xalqının keçmişdə olduğu kimi bu gündə dövlətin yanında duraraq təxribatçılara layiqli cavab verdiyini bildirmişdir.
Çıxış edən qəsəbə sakini Fatma Nooyeva bu kimi hadisələrin yerli sakinləri narahat etdiyini, avar xalqının özünü Azərbaycanın bir parçası hesab etdiyini, hər zaman dövlət tərəfindən lazımi qayğı gördüklərini, bu iğtişaşları törədən şəxslərin aşkar olunaraq tezliklə cəzalandırılmasını istədiklərini bildirdi. Daha sonra çıxış edən qəsəbə sakini İsmayıl Çöpsiyev qəsəbədə yeni xəstəxana binasının və idman zalının inşaasını dövlətdən xaiş etmişdir.
Sakinlər hemçinin uşaq bağçasında uşaqların vaxtını səmərəli keçirmək üçün günlüyə ehtiyyac olduğunu deputatın diqqətinə çatdırdılar. Qəsəbə sakini Maqsud Bazarov çıxış edərək pandemiya dövründə və müqəddəs bayramlar zamanı qəsəbədəki imkansız insanlara dəstək olduğuna görə deputata təşəkkür etdi. Qəsəbə İcra nümayəndəsi Cuma Xəlilov da qəsəbə sakinləri adından qəsəbə sakinlərinə hər zaman dəstək olduğuna, qəsəbənin həlli vacib problemlərini daim dövlət qarşısında qaldırdığı üçün millət vəkili Nəsib Məhəməliyevə təşəkkür etdi.
Qabaqçöl Qəsəbə məktəbinin direktoru cənab millət vəkilini hər zaman olduğu kimi bu ilki tədris ili zamanı imkansız və aztəminatlı ailələrə məxsusi olan məktəblilərin məktəbli forması ilə təzhizinə dəstək olduğu üçün məktəb kollektivi və valideyinləri adından təşəkkür etdi.
Daha sonra görüş fərdi qəbullarda davam etdi. Bəzi məsələlər barədə deputat tərəfindən vətəndaşlara hüquqi izah və məsləhətlər verildi, həlli vacib bəzi məsələlər yerindəcə həll olundu, sakinləri narahat edən digər məsələlər isə müvafiq dövlət orqanlarına çatdırılması üçün deputatın köməkçisi tərəfindən qeydə alındı.