ABŞ rusiyalı milyarder Roman Abramoviçin sanksiyaları pozduğu iddiası ilə iki təyyarəsinin həbsi üçün order alıb.

capar.info xarici mediaya istinadla bildirir ki, iyunun 6-da ABŞ “Boeing 787-8 Dreamliner” və “Gulfstream G650ER” üçün həbs qərarı imzalayıb. Təyyarələrin ümumi dəyəri 400 milyon dolları ötür.

Qeyd olunur ki, Abramoviç Ukraynadakı müharibəyə görə ABŞ-ın sanksiya tətbiq etdiyi rusiyalı oliqarxlar siyahısında yoxdur. Lakin Ticarət Nazirliyi onun lazımi sənədlər olmadan təyyarəni Rusiyaya təkrar ixrac etməklə sanksiyaları pozduğunu iddia edir.
Federal Təhqiqatlar Bürosunun məlumatına görə, “Dreamliner” təyyarəsi mart ayından Dubayda, “Gulfstream” isə Moskvadadır.

Rəsmilər Abramoviçin təyyarələrinin həbsinə aydınlıq gətiriblər. Onların sözlərinə görə, sanksiyalar Amerika istehsalı olan təyyarələrin lisenziyasız ixracını, təkrar ixracını və ya ölkə daxilində transferini qadağan edir.

“Rusiyalı oliqarxlar Ukraynada ölümcül müharibə aparmaq üçün ölkələrinə kömək ediblər. Onların qiymətli varlıqlarına, o cümlədən iki təyyarəyə həbs qoyulması ABŞ qanunlarını pozan və Rusiyanı dəstəkləyənləri məsuliyyətə cəlb etməyin yollarından yalnız biridir” - FTB direktorunun köməkçisi Mixael J. Driscoll açıqlamasında bildirib.