Aprelin24-də Milli Məclisin vı çağırış birinci sessiyasının 7-ci iclası keçirildi. İclasın gündəliyinə 27 məsələ daxil edilmişdi. İstər gündəlik məsələlərlə, istərsə də cari məsələlərlə bağlı yetərincə müzakirələr aparıldı, təklif və rəylər dinlənildi, bəzi ictimai-əhəmiyyətli məsələlər qaldırıldı. Millət vəkilləri Sabir Rüstəmxanlı və Razı Nurullayevin səsləndirdikləri fikirlər daha çox diqqət çəkdiyindən çıxışlarını olduğu kimi veririk.

Millət vəkili Sabir Rüstəmxanlı:
-Mən bir neçə məsələ üzərində dayanmaq istəyirəm. Birinci məsələ ondan ibarətdir ki, görünür, biz tariximizi hələ əməli şəkildə qoruyub saxlamağı, yaşatmağı bacarmırıq və ya bu məsələdə düşmənlərimizdən çox geri qalmışıq. Ermənilər qondarma soyqırımlarına muzey düzəldiblər, ancaq biz yalnız Xocalı faciəsindən başqa, digər faciələrimizi Bakıda hələ yetərincə bir muzeydə əks elətdirə bilməmişik.
İkinci deyəcəyim məsələ, danışıqlarda Qarabağ məsələsindən söz düşəndə hər dəfə bir milyon qaçqın və məcburi köçkünün olduğunu dilə gətirirlər. Bu nə deməkdi? Aradan 30 il keçib, bu bir milyon dəyişilmir, bu statistika donub qalıb? Artıq bu rəqəm milyon yarımdır. Ona görə də bütün danışıqlarda Qarabağdan söhbət gedəndə məsələ belə qoyulmalıdır; milyon yarım qaçqın və məcburi köçkün doğma torpaqlarına, öz yurd-yuvalarına qayıtmaq istəyir, vəssalam!
Üçüncü məsələ isə ondan ibarətdir ki, hörmətli xanım spiker Sahibə xanım, rayonlarımızın coğrafiyası dəyişilməyib, sərhədləri dəyişilməyib, adları dəyişilməyib, amma bizə məlum olmayan səbəbdən rayonların idarələri birləşdirilir, regional idarələr yaradılır. Bu nə deməkdi? Məsələn, bir rayonun qaz idarəsi verilir başqa bir qonşu rayona, işıq idarəsi verilir başqa bir qonşu rayona, mədəniyyət şöbəsi digər bir rayona verilir, təhsil şöbəsi həmçinin başqa bir rayona... Bu nə cür idarəçilikdi? Adamlar qalıb bu rayonların arasında. Xüsusən, indiki pandemiya şəraitində bir rayondan, bir kənddən digərinə getmək qadağan olunduğu vaxtda indi təhsillə bağlı sənəd almaq üçün 100 kilometr yolu Neftçaladan durub getməlidilər Salyana, ordan da hərlənməlidilər Biləsuvara. Onda bu rayonları ləğv edək və idarələr bu şəkildə birləsdirilsin. Fikir verin, rayon qalır, köhnə təfəkkür qalır, idarələr isə tək-tək bu rayonların tərkibindən çıxır, mədəniyyət idarələrinin, kitabxanaların və digərlərinin sayı azaldılır.
Məsələn, Meşə idarəsi deyək ki, Yardımlıdan alınıb verilib Masallıya. Bu idarəyə Masallıda təyin olunan rəis dağları görmədiyi, bilmədiyi, tanımadığı halda deyir, orda filan qədər meşə gözətçisi ixtisar olunmalıdı, sayı çoxdu. Birdən-birə 30 gözətcini işindən azad edib 10 adam saxlayır. Sual olunur, axı, sənin o coğrafiyadan xəbərin varmı bu adamları azaldırsan. Onda bu dağdan o dağa get görüm, neçə gedəcəksən. Ona görə də bu məsələlərə aidiyyatı qurumlardan bir aydınlıq gətirilməlidir.

Millət vəkili Razı Nurullayev:
- Prezident İlham Əliyevin ən çox sevdiyi və istifadə etdiyi sözlərdən biri " ictimai nəzarət" ifadəsidir. Bunu işə ictimai təśkilatlar həyata keçirir. Məlumdur ki, QHT-lər haqqında qanuna məhdudlaşdırıcı maddələr əlavə edilib. İctimai təşkilatlar yeganə olaraq Prezident Yanında Dövlət Şurasının sayəsində nəfəslik ala bilib. Məhdudiyyətlər ayrıca fondlardan maliyyə vəsaitinin alınmasını qadağan edib. Bu qadağa nəticəsində professional ictimai nəzarət demək olar ki, yox olub. İddia edilir ki, bu məhdudiyyətlər bəzi təşkilatların qrant vəsaitinin rəngli inqilablara xərcləndiyi üçün tətbiq edilir. Nə baş verdi? Dövlətçilik əleyhinə işləməsi deyilən təşkilatlar yenə da maliyyələşir və hesabatları da verilmir. Amma nə dəyişdi? Əvəzində bütün neytral və professional təşkilatlar sıradan çıxarıldı. Bu məhdudiyyətlərin tamamilə aradan qaldırılmasını təklif edirəm.
Bir araşdırma apardım və gördüm ki, koronavirusla mübarizə üçün dünyada milyardlarla vəsait ayrılıb. Niyə bizim ictimai təşkilatlar bu fondlardan yaralanıb ehtiyaclı ailələrə kömək etməsinlər? Axı niyə hökumət hər bir məsələyə özü yuklənməlidir? Mövcud resurslardan niyə istifadə olunmasın?
Odur ki, hörmətli xanım sədr, mən xahiş edirəm ki, səlahiyyətlərinizdən istifadə edib bu məsələni qaldırasız.
Bir neçə məsələni də qeyd etmək istəyirəm; Heydər Əliyev Fondu kifayət qədər ailələrə kömək edib və buna görə də birinci vitse-prezidenti Mehriban xanıma təşəkkür edirəm və təklif edirəm ki, bir çox şirkətlərin də nəzdində fondlar yaradılsın ki, onlar da ictimai ailələrə kömək göstərə bilsinlər. Artıq Heydər Əliyev Fondu tərəfindən bu ənənə yaradılıb və çox normal şəkildə inkişaf etdirilə bilər.