İlham İsmayılov Mingəçevir şəhər İcra Hakimiyyətinə Azərbaycan Respublikası Prezidentinin 17.12.2018-ci il tarixli sərəncamı ilə başçı təyin olunub. Buna qədər o, sözügedən şəhərdə 2008-2018-ci illərdə İcra Hakimiyyəti başçısının müavini və birinci müavini vəzifələrində çalışıb. Onu vəzifəyə 2007-2012-ci illərdə Mingəçevir şəhər İcra Hakimiyyətinə başçılıq etmiş Mübariz Ağayev gətirib. İlham İsmayılov daha sonra hazırda Gəncə şəhərinə başçılıq edən, 2012-2018-ci illərdə Mingəçevirin başçısı olmuş Niyazi Bayramovla çalışıb. Yəni icra başçılığı yolunda dərsini korrupsionerlərdən alıb. İşlərini elə bu yolla da davam etdirir.

Mingəçevirdə İlham İsmayılovun kadrları da onun istədiyi yolla gedirlər. Məhz elə buna görə də son dövrlərdə şəhər sakinlərinin narazılıqlarını əks etdirən şikayətlərin sayı artmaqdadır. Sakinlər sosial şəbəkələrdə və elektron kütləvi informasiya vasitələrində daha çox şəhərin məhəllədaxili yollarından, qaranlıq küçələrindən,baxımsız qalmış park və yaşıllıqların düşdüyü vəziyyətdən narazıdılar. Amma Mingəçevirdə yolların təmirinə də, şəhərin yaşıllaşdırılmasına da vəsaitlər ayırır. Milyonlarla manat. Amma bu vəsaitlərin hara xərcləndiyi bəlli deyil. Məsələn, Mingəsevir şəhər Mənzil Təsərrüfatı və Abadlaşdırma İdarəsinin dövlət satınalmaları yolu həyata keçirdiyi işlərə külli miqdarda vəsait ayrıldığını açıq-aydın görmək olar. Ayrılmış vəsaitlərin müqabilində görülən işləri isə görmək olmur. Bəs bu vəsaitlər hara və necə xərclənir? Bunu başdan ayağa şübhələrlə dolu tender prosedurlarının nəticələrində görmək olar. Həmin tenderlərin bir neçəsini diqqətinizə çatdırırıq.

Mingəsevir şəhər Mənzil Təsərrüfatı və Abadlaşdırma İdarəsi mal-materialların, alətlərin, nəqliyyat vasitələri üçün ehtiyat hissələrinin, təsərrüfat malları və dəftərxana ləvazimatlarının satınalınması üzrə 21.02.2022-ci il tarixdə müsabiqə yolu ilə başlanılmış açıq tenderə yekun vurulub və “ALPAN GROUP” Məhdud Məsuliyyətli Cəmiyyəti ilə 149 999.99 manat məbləğində satınalma müqaviləsinin bağlanıldığını 01.04.2022-ci il tarixdə elan edilib.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “ALPAN GROUP” Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin Bakı şəhəri Kiçik Sahibkarlıqla İş üzrə Baş İdarəsində 24.01.2022-ci il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanının BAKI ŞƏHƏRİ, BİNƏQƏDİ RAYONU, MİR CƏLAL 9A MKR, ev 121A, m. 26, qanuni təmsilçisinin isə Şöyübov Fərid Tamerlan oğlu olduğu göstərilir.

Apardığımız araşdırmalar zamanı müəyyən etdik ki, Mənzil Təsərrüfatı və Abadlaşdırma İdarəsinin Tender Komissiyasının satınalma müqaviləsi bağladığı “ALPAN GROUP” MMC açıq tenderin keçirilməsi barədə verilən elandan, yəni 21.02.2022-ci il tarixdən cəmi 27 gün əvvəl, 24.01.2022-ci il tarixdə dövlət qeydiyyatına alınıb. Tender müsabiqəsindən bir ay əvvəl yaradılmış, maddi texniki bazası bəlli olmayan bir MMC ilə 150 min manat civarında satınalma müqaviləsinin bağlanılması nə dərəcədə qanunauyğundur?

Bundan əlavə “Dövlət Satınalmaları Haqqında” Azərbaycan Respublikası Qanununun tələbləri Mingəsevir şəhər Mənzil Təsərrüfatı və Abadlaşdırma İdarəsi tərəfindən 2021-ci ildə keçirilmiş tenderlərdədə gobud şəkildə pozulub. Belə ki, İdarənin Tender Komissiyası müxtəlif malların və xidmətlərin satınalması üzrə “FARXALI” Məhdud Məsuliyyətli Cəmiyyəti ilə ümumi olaraq 268 833 manat məbləğində 4 satınalma müaviləsi bağlayıb.

Nəqliyyat vasitələrinin ehtiyyat hissələrinin, inventar, dəftərxana və təsərrüfat mallarının satınalınması üzrə 11570.81 manat məbləğində satınalma müaviləsi 30.12.2021-ci il tarixdə;

Mal-material və alətlərin satınalınması üzrə 122 679.92 manat məbləğində satınalma müaviləsi 30.12.2021-ci il tarixdə;

Mingəçevir şəhəri Mənzil Təsərrüfatı və Abadlaşdırma İdarəsinə özüboşaldan yük avtomobilinin satınalınması üzrə 10799.36 manat məbləğində satınalma müaviləsi 23.12.2021-ci il tarixdə;

“Mal-materialların, alətlərin, nəqliyyat vasitələri üçün ehtiyyat hissələrinin, təsərrüfat malları və dəftərxana ləvazimatlarının satın alınması” üzrə 123 783.21 manat məbləğində satınalma müaviləsi 18.10.2021-ci il tarixdə;

Kommersiya qurumunun hüquqi şəxslərin dövlət reyestrinə daxil edilmiş məlumatlarında “FARXALI” Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində 18.01.2016-cı il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanının BAKI ŞƏHƏRİ, YASAMAL RAYONU, ƏLƏSGƏR ƏLƏKBƏROV, ev 14A, MƏH. 507/511, m. 31, qanuni təmsilçisinin isə İbrahimov Mabud Qürbət oğlu olduğu göstərilir.

Açıq mənbələrdə müxtəlif malların və xidmətlərin satınalması üzrə ayrı-ayrı tenderlərin qalibi olmuş bu MMC-nin barəsində heç bir məlumat yoxdu və analoji işlərdə təcrübəsinin olub olmaması suallar doğurur.

Dövlət satınalmalarının vahid internet portalına yerləşdirilmiş məlumatlarda Mingəsevir şəhər Mənzil Təsərrüfatı və Abadlaşdırma İdarəsi 2021-ci il üçün ehtiyat hissələrinin, mal-materialların, təsərrüfat mallarının və dəftərxana ləvazimatlarının satınalınması üzrə 154 494.92 manat məbləğində satınalma müaviləsini “NIHAD MMC” Məhdud Məsuliyyətli Cəmiyyəti ilə bağlanıldığı göstərilir. Lakin araşdırdıqda göstərilən VÖEN-in “NIHAD MMC”-yə deyil, “ABADLIQ İNŞAAT” Məhdud Məsuliyyətli Cəmiyyətinə məxsus olduğu bəlli oldu.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “ABADLIQ İNŞAAT” Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin 11 saylı Ərazi Vergilər İdarəsində 03.02.2015-ci il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanı MINGƏÇEVİR ŞƏHƏRİ, ev Boz Dağ küçəsi 1, m. 46, qanuni təmsilçisinin isə Mirzəyeva Elnurə Sabir qızı olduğu göstərilir.

Apardığımız araşdırmalar zamanı “ABADLIQ İNŞAAT” MMC-nin qanuni təmsilçisi kimi göstərilən Mirzəyeva Elnurə Sabir qızı həm də “MİNGƏÇEVİR TƏMİR TİKİNTİ-18” Məhdud Məsuliyyətli Cəmiyyətinin qanuni təmsilçisidir. Elnurə Mirzəyevanın təmsilçisi olduğu “MİNGƏÇEVİR TƏMİR TİKİNTİ-18” MMC 2019-2021-ci illərdə, Ağdaş rayon Pirəzə Mexaniki Suvarma İdarəsinə maşın mexanimlərin və nəqliyyat vasitələrinə ehtiyyat hissələrinin alınmasından tutmuş, Mingəçevir şəhərində 2019-cu ildə Dünya Azərbaycanlılarının həmrəylik günü və Yeni il tədbirlərinin keçirilməsi işlərinə, Yevlax şəhər Mənzil Kommunal Təsərrüfatı Birliyinə xüsus texnikanın satınalınmasından tutmuş, Naftalan şəhər Mənzil Kommunal Təsərrüfatı Birliyinə mal-materialın alınmasına qədər 11 tender və kotirovka soröusunun qalibi olub.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “MİNGƏÇEVİR TƏMİR TİKİNTİ-18” Məhdud Məsuliyyətli Cəmiyyətinin İqtisadiyyat Nazirliyi yanında Dövlət Vergi Xidmətinin 11 saylı Ərazi Vergilər İdarəsində 12.06.2018-ci il tarixdə dövlət qeydiyyatına alındığı bildirilir. Nizamnamə kapitalı 20 manat olan MMC-nin hüquqi ünvanı MINGƏÇEVİR ŞƏHƏRİ, MİNGƏÇEVİR ŞƏHƏRİ, NƏSİMİ, ev 8 B, qanuni təmsilçisinin isə Mirzəyeva Elnurə Sabir qızı olduğu göstərilir.

Qeyd edək ki, Mingəçevirdə nədənsə abadlıq və yaşıllaşdırma işlərinin başında qadın biznesmenlər durur. Ötən yazılarımızın birində Mingəçeviri həm abadlaşdıran, həm yaşıllaşdıran, həm də işıqlandıran biznesmen xanım barədə məlumat vermişdik. Əslində isə bu xanımlar İlham İsmayılovun yaxın, yaxud uzaq qohumlarından başqa kimsə deyil və başçının yaxın adamları tərəfindən idarə olunurlar. Mingəsevir şəhər Mənzil Təsərrüfatı və Abadlaşdırma İdarəsinin rəisi Qürbət Məmmədov da elə İlham İsmayılovun yaxınlarından sayılır. Düzdü onu bu vəzifəyə Niyazi Bayramov təyin edib. Amma o vaxtlar birinci müavin olan İlham İsmayılovun istəyi ilə. İndi də əl-ələ verib Mingəçeviri kağız üzərində abadlaşdırır, binaların dam örtüyü dəyişdirir, əsaslı təmir işlərini görür, yeni yaşıllıqlar salırlar.

Aktualinfo.org