Hazırkı hərbi gərginlik fevral ayında Qarabağdakı separatçı-terrorçu rejimin qanunsuz "parlamenti"nin beynəlxalq ictimaiyyətə Azərbaycana “təzyiq” etmək müraciəti ilə “İşğal olunmuş ərazilər haqqında” qanunu qəbul etməsinin nəticəsidir. capar.info moderator.az-a istinadla xəbər verir ki, bu fikri analitik, “Turan” agentliyinin redaktoru Şahin Hacıyev "Kavkazskiy uzel" nəşrinə açıqlamasında söyləyib.

"Qarabağ mövzusu beynəlxalq gündəmdən yox olub. Hətta ATƏT-in Minsk qrupu da de-fakto fəaliyyətini dayandırıb. İndi gündəmdə olan məsələlər Ermənistanla Azərbaycan arasında nəqliyyat kommunikasiyalarının bərpası, iki ölkə arasında sərhədin delimitasiyası və sülh müqaviləsinin imzalanmasıdır. Ona görə də separatçılar yenidən diqqəti özlərinə cəlb etmək üçün mübarizə aparırlar. Bunun üçün onlar regionda sabitliyi pozmağa çalışırlar. “Siyasi təşəbbüslərlə” yanaşı, Qarabağ separatçıları bu yaxınlarda Rusiya sülhməramlılarının qoruması altında hərbi istehkamlar da yaratmağa başlayıblar. Bundan əlavə, onlar Rusiya sülhməramlılarının müşayiətinə rəğmən Azərbaycan nəqliyyat karvanının yolunu bağlayıblar”, - deyə analitik bildirib.

Bundan başqa, Hacıyevin fikrincə, Ukrayna hadisələri də Qarabağda vəziyyətin gərginləşməsinə təsir edib.

"Qarabağ ermənilərinin Moskvanın onları Abxaziya, Donbas və s. uyğun olaraq analoji tanıması ilə bağlı illüziyaları yaranıb. Ona görə də separatçılar son təxribatlarla hələ də mövcud olduqlarını, "müqavimət göstərdiklərini", "müstəqilliklərini müdafiə etdiklərini" göstərməyə çalışırlar. Bu, çox təhlükəli oyundur və Azərbaycan buna hələ də təmkinlə reaksiya verir. Lakin bütün bunlar davam edərsə, Azərbaycan tərəfinin cavabı sərt olacaq”, - Hacıyev belə deyib.

Azərbaycanın hansı addımları ata biləcəyi ilə bağlı suala isə analitik cavab tədbirlərinin çox fərqli ola biləcəyini deyib:

“Artıq atəşin aparıldığı mövqelər zərərsizləşdirilə bilər. Azərbaycan ordusu Ermənistan hərbçilərinin yerləşdiyi, ölkə qanunlarına əsasən qanunsuz silahlı birləşmələr olan bəzi ərazilərdə təmizləmə əməliyyatı keçirə bilər. Azərbaycan etibarlı nəqliyyat əlaqələrini təmin etmək üçün Qarabağın şimalından Kəlbəcər rayonuna gedən yolu da nəzarətə götürə bilər”.

Hacıyevin sözlərinə görə, Rusiya sülhməramlıları 10 noyabr 2020-ci il tarixli birgə bəyanatda nəzərdə tutulduğu kimi, Qarabağın demilitarizasiyasını təmin etmədikləri üçün Azərbaycan ordusunun hərəkətlərinə cavab verə bilməyəcəklər.

“Sənəddə göstərilirdi ki, sülhməramlıların yeridilməsi ilə Ermənistan silahlı qüvvələri Qarabağı tərk etməlidir. Əgər Rusiya kontingenti bunu etməyibsə, o zaman Azərbaycan özü bu tapşırığı yerinə yetirə bilər”, - deyə Hacıyev vurğulayıb.

O, rus hərbçilərinin ermənilərin tərəfini tuta biləcəyinə də şübhə edir.

“Rusiya ordusunun bunu edəcəyi ehtimalı azdır. Çox güman ki, müdaxilə etməyəcəklər. Prinsipcə, indiyədək hərbi insidentlər zamanı onlar ciddi müdaxilə etməyiblər. Rusiya ordusunun hərbi əməliyyatlar keçirmək üçün beynəlxalq mandatı yoxdur. Onların Azərbaycan hərbçilərinə müqavimət göstərmək potensialı da yoxdur. Ümumiyyətlə, Ukraynanı işğalıyla məşğul olan Moskva heç bir hərbi əməliyyata sanksiya qoyması bir yana, müdaxilə də etməyəcək. Bu, bir tərəfin mövqeyini tutmaq, Ermənistan-Azərbaycan nizamlanması prosesində moderator rolunu itirmək və Rusiya Federasiyasının fəal iştirakı üçün daha bir beynəlxalq platformanı itirmək demək olardı”, - şərhçi bildirib.

Onun fikrincə, Azərbaycan Qarabağda xüsusi əməliyyat keçirsə, Rusiya hərbçilərinə əvvəlcədən xəbərdarlıq ediləcək və onlar mümkün hərbi əməliyyatlar zonalarını tərk edəcəklər, çünki onların vəzifəsi mülki əhalini qorumaqdır.