capar.info[b][/b] “Qazaxıstanda baş verən hadisələri digər dost ölkələr kimi Ukrayna da diqqət və narahatlıqla izləyir. Ən azından ona görə ki, qeri-rəsmi məlumatlara görə, hazırda orada təxminən 300-400 min ukraynalı yaşayır. Bu baxımdan Qazaxıstanda ukraynalılar qazaxlar, ruslardan, özbəklərdən sonra dördüncü yerdə gedir”. DİA.AZ xəbər verir ki, bu sözləri Editor.az-a Qazaxıstanda yaşanan prosesləri şərh edərkən tanınmış ukraynalı hərbi ekspert Yuri Koçevenko deyib.

O bildirib ki, Qazaxıstanda insanların etirazına səbəb olan çoxsaylı səbəblər mövcuddur: “Onların sırasında ilk növbədə son 30 ildə Qazaxıstanın eyni qüvvə tərəfindən idarə edilməsini, hakimiyyətin düşünülməmiş siyasətini, bunun nəticəsində demokratik azadlıqların məhdudlaşdırılması, müxalifətin olmaması və getdikcə və sosial-iqtisadi problemlərin ağırlaşmasını qeyd etmək lazımdır. Bütün bunlar son nəticədə xalqın səbr kasasının daşmasına və gizli narazılıqların açıq etiraz formasına çevrilməsinə gətirib çıxardı. Çünki qazaxlar indiyədək seçkilər, dinc etiraz aksiyaları kimi leqal vasitələrlə öz siyasi iradələrini ifadə edə bilməyiblər”.

Baş verən hadisələri bəhanə edib Rusiyanın KTMT adından öz Silahlı qüvvələrini Qazaxstana yeritməsini yanlış addım hesab edən politoluqun sözlərinə görə, sülhməramlı missiyalar adətən BMT bayrağı altında hərəkət edən beynəlmiləl qüvvələrdən təşkil olunur və yalnız hansısa dövlətə xarici müdaxilə olduğu təqdirdə həyata keçirilir: “İndiki şəraitdə “sülhməramlı missiya” adı altında rus qoşunlarının Qazaxıstana yeridilməsi birmənalı olaraq işğal faktıdır. Ötən illərdə biz Ukrayna, Gürcüstan və Moldovaya yeridilən rus “sülhməramlıları”nın fəaliyyətindən yaxşı xəbərdarıq. Həmin “sülhməramlılar” az sonra sözügedən ölkələrdə işğalçı qüvvəyə çevriliblər. Bu bizə tanış ssenaridir. Qazaxıstan bu proseslər zamanı doğru seçim etməzsə, öz müstəqilliyini itirə və Rusiyanın maraqlarının ifadəçisi olan ölkəyə çevrilə bilər”.

Yuri Koçevenko Qazaxıstandakı hadisələr fonunda hazırda formal da olsa KTMT-nin sədri vəzifəsini icra edən Ermənistan baş naziri Paşinyanın Qazaxıstana qoşun yeritməklə bağlı tez-tələsik verdiyi bəyanata da münasibət bildirib: “Doğrudur, bu bəyanat Rusiyanın diqtəsi ilə verilib. Paşinyan müharibəni uduzmuş, məğlub bir ölkənin başçısıdır, uduzmuş hərbi rəhbərdir. Bu səbəbdən onun belə bir missiyaya rəhbərlik etməyə ən azından mənəvi haqqı yoxdur.

Lakin Paşinyanın bu qeyri-adi canfəşanlığı, səsləndirdiyi fikirlər, eləcə də Qazaxıstan hadisələri fonunda müşahidə olunan Rusiya-Ermənistan yaxınlaşması gələcəkdə Azərbaycana qarşı da təhlükəli presedentlərə yol aça bilər. Bu vəziyyət rəsmi Yerevanda revanşist meyllərin güclənməsinə, Qarabağa müvəqqəti olaraq yerləşdirilmiş rus “sülhməramlıları”nın qalıcı faktora çevrilməsi üçün söhbətlərin ortaya atılmasına rəvac verə bilər”.

Hadisələrin hansı məcrada davam edəcəyini və hansı sonluqla bitəcəyini proqnozlaşdırmağın çətin olduğunu bildirən politoloq qeyd edir ki, hazırda Qazaxıstana dost olan ölkələrin əsas vəzifəsi ən azından siyasi-diplomatik və media müstəvisində ona dəstək olmaq, baş verən hadisələr haqqında dünya ictimaiyyətinə doğru-düzgün məlumat verməkdir.: “Əks təqdirdə Qazaxıstanı hazırda Rusiyanın hərbi-siyasi əlavəsinə çevrilmiş Belarusun taleyi gözləyir”.