"Şəhid anaları başımızın tacıdır. Nə desələr, hətta haqsız da olsalar, yenə də gözümüzün nurudurlar, başımız-gözümüz üstdə yerləri var. Amma... Onları o cür danışdırıb yaymaq, məsuliyyətsizcəsinə müqəddəs duyğular üzərindən ucuz tiraj toplamaq, ya da elə görüntü yaratmaq təxribatdır, milli təhlükəsizliyimizə təhdiddir, şəhidlərimizin ruhuna hörmətsizlikdir".

capar.info yenisabah.az-a istinadən xəbər verir ki, bu sözləri “Teleqraf” Media Qrupunun rəhbəri, əməkdar jurnalist Aynur Camalqızı şəhid generalımız Polad Həşimovun adından sui-istifadə edən bəzilərinin yaydığı video haqda qeyd edib.

A.Camalqızı bildirib ki, bu təşəbbüslərin qarşısı dərhal alınmalıdır:

“Şəhidlərimiz də, onların ailə üzvləri də toxunulmazdır və heç kimsə, heç bir qüvvə onların saflıqlarından, ağrılarından, yaralarından öz çirkin siyasi məqsədləri üçün istifadə etməməlidir. Edənlər cəzalandırılmalı, o yaydıqları internetdən yığışdırılmalıdır. Media, azad söz bu deyil, bu olmamalıdır...”