capar.info : - Dekabrın 1-də Moskvada Azərbaycan, Ermənistan və Rusiya Baş nazirlərinin müavinləri - Şahin Mustafayev, Mher Qriqoryan və Aleksey Overçukun iştirakı ilə üçtərəfli işçi qrupunun iclası keçirilib.

Bu, noyabrın 26-da Soçidə İlham Əliyev, Vladimir Putin və Nikol Paşinyan arasında Bəyanatın imzalanmasıyla bitən görüşdən sonraya təsadüf edib. Ermənistan Baş nazirinin müavininin mətbuat xidmətinin məlumatına görə, Ermənistan, Rusiya və Azərbaycan Baş nazirlərinin müavinlərinin iştirakı ilə işçi qrupu yaxın günlərdə yenidən görüşəcək. Görüşdə regional kommunikasiyaların açılması üzərində işini davam etdirəcəyi bildirilib:

“Üçtərəfli işçi qrupunun görüşü önümüzdəki günlərdə davam edəcək. Nəticələrdən yalnız görüş bitdikdən sonra danışmaq olar. Görüş bir gün əvvəl başlayıb, lakin hələ yekunlaşmayıb. Hazırda növbəti görüşün vaxtı və yeri ilə bağlı dəqiq məlumat yoxdur".

Qeyd edək ki, erməni mətbuatında yer alan xəbərlərə əsasən, sözügedən görüş gərgin şəkildə keçirilib. Görünən odur ki, bəzi məsələlərdə razılaşma olmadığı üçün görüş tam başa çatmayıb. Məhz bu səbəbdəndir ki, erməni tərəfi görüşün yekunlaşması üçün davam etdiriləcəyini bildirib.

Keçmiş xarici işlər naziri Tofiq Zülfüqarov Cebhe.info-ya açıqlamasında deyib ki, Ermənistan tərəfi Zəngəzur dəhlizinin açılmaması üçün cəhdlərinə davam edir:

“Artıq bu görüşlərin nə üçün keçirildiyi hamıya bəllidir. Görüşdə tərəflər arasında kommunikasiyaların bərpası barədə müzakirələr getməli idi. Görünən odur ki, Ermənistan tərəfi Zəngəzur məsələsində yenə öz bildiyi kimi mövqe sərgiləyir. Lakin Azərbaycan Ermənistandan 10 noyabr 2020-ci ildə imzalanan üçtərəfli Bəyannamədəki müddəaların həyata keçirilməsini tələb edir. Çünki rəsmi İrəvanın 10 noyabr Bəyannaməsinin mahiyyətini dəyişmək fikrində olduğu hiss olunur. Hər halda onlar bunun üçün cəhd göstərməyə çalışırlar. Reallıq odur ki, bunun kapitulyasiya sənədi olduğu da hamıya məlumdur. Bu sənədə əsasən, Ermənistan tərəfindən götürülən öhdəliklər məhz hərbi məğlubiyyət nəticəsində baş verib. Təbii ki, Azərbaycan bu məsələlərin tam şəkildə və sənədə uyğun olaraq həyata keçirilməsini tələb edir”.