capar.info : - Azərbaycan xalqı bir ildir ki, qazandığı tarixi və şanlı qələbənin sevincini yaşayır.

Hazırda qələbə günlərimizin işğal günlərini əvəz etməsi Azərbaycan xalqının yenilməz tarixi nailiyyətidir. Məhz 20 noyabr da həmin şanlı tarixlərdəndir.

Belə ki, Vətən müharibəsində əldə etdiyimiz qələbə nəticəsində Azərbaycan, Rusiya və Ermənistan liderləri arasında imzalanmış üçtərəfli Bəyanata əsasən, noyabrın 20-də Ağdam şəhəri və Ağdam rayonunun işğal altında olan əraziləri Azərbaycana təhvil verilib və bununla da çoxsaylı insan tələfatının qarşısı alınıb.

Xatırladaq ki, 23 iyul 1993-cü il tarixdə Ermənistan Silahlı Qüvvələri tərəfindən Ağdam şəhəri işğal olunub.

Sahəsi 1150 kvadrat km olan rayonun 202 min 200 nəfər əhalisi var. Hazırda məcburi köçkün həyatı yaşayan əhali respublikanın müxtəlif şəhər və rayonlarında məskunlaşıb. 2008-ci ildə “Lonely Planet” jurnalı Ağdamı “Qafqaz Hiroşiması” adlandırıb. 2010-cu ildə “Əl-Cəzirə” Ağdamı “Ruhlar şəhəri” siyahısına salıb.

Ümumiyyətlə, Dağlıq Qarabağın ərazisinin ermənilər tərəfindən işğal olunması bütün beynəlxalq qanunlara zidd idi. Buna baxmayaraq, Ermənistan illərdi qanunsuz əməllərini davam etdirirdi. 30 ilə yaxındır əhəmiyyət verilməyən beynəlxalq qurumların təsdiq etdiyi qətnamələr heç bir işə yaramadı.

Azərbaycan xalqı özü beynəlxalq qanunların aliliyini və tarixi ədaləti bərpa etdi. Azərbaycan döyüş meydanında qazandığı qələbəni həm də siyasi müstəvidə, masa arxasında təsdiq edib. Belə ki, 27 sentyabr tarixində başlamış Vətən müharibəsi Ali Baş Komandanın rəhbərliyi altında böyük Zəfərlə yekunlaşıb.

Millət vəkili Müşfiq Məmmədov Cebhe.info-ya açıqlamasında bildirib ki, Azərbaycan dünya birliyinin 30 il ərzində edə bilmədiklərini 44 gün ərzində edərək tarixi ədalətə nail olub:

“İşğal altında olan torpaqlarımızın azad olunması hansı yolla olursa-olsun bizim üçün böyük ruh yüksəkliyi, sevinc hissidir.

Çünki torpaqlarımızın azad olunması uzun illər torpaq həsrətilə yaşayan insanlarımızın öz ana yurduna dönməsi üçün ilk addımdır. Bu baxımdan qürurvericidir. İkinic tərəfdən ona görə qürurvericidir ki, ermənilər və Ermənistan dövləti bu bəyanatı və razılaşmanı məcburiyyət altında imzaladı və bu bir kapitulyasiya aktı idi.

Çünki əks halda Azərbaycan Ordusunun sonrakı fəaliyyəti onlar üçün faciəvi yekunlaşa bilərdi. Bunu da dəfələrlə həm Ermənistan rəhbərliyi, həmçinin müstəqil analitiklər də qeyd edirdilər. Amma bizim torpaqlarımızı azad etməmizdə, Ağdam rayonunun azad edilməsində diplomatik addım atmağımızın bir önəmi ondan ibarətdir ki, Azərbaycanın inkişaf etmiş həm Ordusunun, həm də xarici siyasətinin, o cümlədən yetişmiş dövlət imici var.

Bu, ondan ibarətdir ki, biz haqlı davamızı həm döyüş meydanınd, həm də diplomatik cəbhədə qazana bilirik. Təbii ki, humanitar tərəfdən qiymətləndirdikdə isə Azərbaycan dövləti heç zaman mənasız insan itkilərinin tərəfdarı olmayıb. Nəticə ondan ibarətdir ki, Azərbaycan Cənubi Qafqazın ən güclü dövlətidir. İstər dövlətçiliyin digər atributları baxımından, həmçinin də hərbi-siyasi güc baxımından. İkinci nəticə ondan ibarətdir ki, biz 30 il ərzində xalqımızın arzularını həyata keçirə bildik.

Ordumuz Ali Baş Komandanın ətrafında sıx birləşərək “Dəmir yumruq” əməliyyatı ilə öz arzularını həyata keçirdi. Həmçinin də dünya birliyinə mesaj verdi ki, sizin edə bilmədiklərinizi biz 44 gündə vahid amal uğrunda birləşərək həm diplomatik yolla, həm hərbi yolla etdik”.