capar.info : - Artıq bəlli bir müddətdir ki, Mədəniyyət Nazirliyi tərəfindən həyata keçirilən “Səhnədən səngərə” layihəsi cəmiyyətdə böyük maraqla qarşılanamqdadır. Vətən müharibəsində iştirak edən mədəniyyət nümayəndələrinin cəmiyyətə tanıdılmasına xidmət edən bu layihə, dar məqamda bütün xalqın, onun hər bir təmsilçisinin Ali Baş Komandanın ətrafında sıx birləşdiyini göstərir.

Moderator.az-a açıqlama verən Xalq artisti Valeh Kərimov, Mədəniyyət Nazirliyinin “Səhnədən səngərə” layihəsinin mühüm önəm kəsb etdiyini vurğuladı:

“Vətən müharibəsində iştirak edən şəxslərin cəmiyyətə tanıdılması müsbət hadisədir. Çünki hər bir mədəniyyət nümayəndəsi həm də bir əsgərdir. Onlar da bu dövlətin vətəndaşı, bu vətənin övladlarıdır. Əgər hər hansı bir mədəniyyət nümayəndəsi Vətən müharibəsinə qatılıbsa, bu müharibədə iştirak edibsə, vətənin işğaldan azad edilməsinə töhfə veribsə, o zaman onu niyə cəmiyyətə tanıtmayaq ki? Cəmiyyət, xalq bu cür insanları tanımalıdır. Gənc mədəniyyət işçiləri, gələcəkdə bu sahədə çalışan şəxslər də bilməlidir ki, mədəniyyət nümayəndələri də vətənin müdafiəsində iştirak edib, lazım gələndə səhnənə səngərlə əvəz ediblər. Bu baxımdan Mədəniyyət Nazirliyinin “Səhnədən səngərə" layihəsini faydalı və əhəmiyyətli hesab edirəm. Düşünürəm ki, bu cür layihələr həm qəhrəmanların, vətənin müdafiəsində əməyi olan şəxslərin cəmiyyətə tanıdılması, həm də gənc nəslin vətənpərvərlik tərbiyəsinin inkişafı baxımından önəmli addımlardır”.