capar.info : - Xəbər verdiyimiz kimi, Azərbaycanda kitabların, o cümlədən bütün dərsliklərin idxalı və satışı ƏDV-dən azad edilir.

Bununla bağlı, bu gün Milli Məclisdə ictimai müzakirə təşkil olunub. Qanun layihəsinə görə, siyahısı müvafiq icra hakimiyyəti orqanı tərəfindən təsdiq edilən KİV məhsullarının və kitabların (elektron kitablar istisna olmaqla), habelə dərslik komplektlərinin idxalı və satışı, həmin malların (məhsulların) istehsalı (nəşri) ilə bağlı rulon və ya vərəqə şəklində kağızın idxalı və satışı, mətbu KİV məhsullarının və kitabların (o cümlədən elektron kitabların), habelə dərslik komplektlərinin istehsalı ilə bağlı redaksiya, nəşriyyat və poliqrafiya fəaliyyəti (reklam xidmətləri istisna olmaqla) ƏDV-dən azad olunur.
Məsələ ilə bağlı Bakupost.az -a danışan “Qanun nəşriyyatının” direktoru Şahbaz Xuduoğlu bildirib ki, yeni qərarla kitabların qiyməti aşağı düşəcək, oxucuların sayı artacaq:
“Uzun illərdir bununla bağlı təşəbbüslər var idi. Amma o təşəbbüslər həmişə qeyri müəyyən vaxta qədər təxirə salınırdı. Nəhayət, ƏDV-nin kitab üzərindən götürülməsi faktı reallaşmaq üzrədir. Yaxın zamanlarda parlamentin növbəti iclaslarının birində müzakirəyə çıxarılacaq. Çox güman ki, Vergi Məcəlləsində dəyişikliklər aparılacaq. Bu dəyişikliklər əsasında kitablar özü bir sənaye faktoru olaraq həm istehsalatı, həm yayımı, həm də satışı ƏDV-dən azad olur.
Eyni zamanda, kitab üçün gətirilən kağız və digər xammal materialları da ƏDV-dən azad olacaq. Bu da əlbəttə ki, kitabın maya dəyərini aşağı salacaq. Biz buna hüquqi sənəd kimi deyil, həm də dövlətin kitab mədəniyyətinə olan müsbət münasibəti kimi baxırıq. Çox təqdirəlayiq haldır ki, Azərbaycan kitabı bundan sonra ƏDV-siz fəaliyyət göstərəcək. Bu həm də yazıçılara və yazıçılıq sənətinə olan müsbət münasibətdir. Yazıçıya stimul verir ki, onun yazdığı yazı dövlət vergisinə cəlb olunmayacaq. Bu mənada çox müsbət addımdır”.

0