capar.info : - “Bu insanlar nə düşünür, etdiklərinin fərqindədirlərmi?”

Bu fikirləri Cebhe.info-ya tanınmış teatrşünas-tənqidçi Anar Burcəliyev Qax Dövlət Kukla Teatrının sabiq direktoru Nazim Mahmudovun vəzifə səlahiyyətlərindən, qulluq mövqeyindən istifadə etməklə mənimsəmə və israf etmə əməli törətməsi, hüquq pozuntuları nəticəsində mərkəzi icra hakimiyyəti orqanının nüfuzuna xələl gətirən əməllərə yol verməsi səbəbindən tutduğu vəzifəsindən çıxarılması faktına münasibət bildirərkən deyib. Onun sözlərinə görə, çox maraqlı fakdır ki, bu kimi vəzifə sahibləri heç biri əməllərindən çəkinmir:

“Düşünürlər ki, tutsa lap yaxşı, tutmasa, babalı Sərvərin boynuna. Yəqin ki, canlarını qurtaracaq qədər imkanlarının olacağını düşündüklərindən bu kimi əməllərinə son demirlər. Əgər belə olmasaydı, yəqin ki, dərindən düşünüb, daşınmış olardılar. Maraqlı fakt burasındadır ki, cəmi vur-tut 60 nəfərlik kollektivi olan bir müəssisədə bu kimi faktlar bəlli olursa, demək ki, 140 və ya 400 nəfərdən artıq kollektivi olan mədəniyyət ocaqlarında faktların üç qatı var”.

Anar Burcəliyev hesab edir ki, istintaq müddətində dövlətə dəymiş ziyanın tam şəkildə dövlət büdcəsinə ödənildiyindən, iş üzrə icraata cinayət-prosessual qanunvericiliyin tələblərinə əsasən xitam verilməsi də düzgün deyil:

“Ortaya məntiqdən yaranan bir sual da çıxır. Əgər ki, bu vəsaiti mənimsəmissənsə, demək ki, illərdir ki, dədə malı kimi xərcləməklə məşğulsan. Bəs yenidən bu bəlli olan məbləği haradan əldə edib dövlət büdcəsinə qaytarmış olursan? Maraqlı deyilmi? Yoxsa illərdir mənimsədiklərini seyflərdə qoruyub saxlayırlar? Düşünürəm ki, bu məqamı da daha dərindən fikirləşməklə qanunun aliliyi qarşısında cavab verməlidirlər. Bu tip şəxslərin bağışlanması doğru deyil. Korrupsioner cəzasız qaldıqda qanunun aliliyi kölkədə qalmış olur”.