capar.info : - "Vətəndaş və inkişaf partiyasının sədri Əli Əliyevə məsləhət görərdim ki, ağlını başına yığsın. Onu-bunu söyməklə uğur əldə etmək olmaz. Deyir ki, Tahir Kərimli xalq tərəfindən sevilmir. Çıxışlarıma minlərlə xoş rəylər yazırlar, bu sevgi deyil?! Ümumiyyətlə Əli Əliyev vaxtilə partiyadan qovulduqdan sonra təxminən 10 il yoxa çıxdı, səsi çıxmırdı. İndi bir neçə ildir ki, fəallaşıb. Görünür, kiminsə sifarişini yerinə yetirir".

Bunu Pravda.az -a açıqlamasında Milli Məclisin deputatı Tahir Kərimli deyib.

T.Kərimli bildirib ki, son illər Əli Əliyev müxtəlif televiziya verilişlərində onun əleyhimə çıxışlar edir: “Həmçinin mənlə yanaşı, dövlət başçısı və hökumətin digər nümayəndələrininin ünvanına da tənqiddən başqa, ağır sözlər də deyir. Açığı, Əli Əliyevin haqqımda danışdıqlarına münasibət bildirmək istəmirdim, çünki ona ən yaxşı cavabı AMİP funksioneri Əli Orucov verib. Əli Əliyevin keçmiş həyat yoldaşı onun əxlaqsızlığı, övladlarının qayğısına qalmaması, özündən çox böyük qadın ilə ailə həyatı qurması barədə iddialar irəli sürür. Əslində, bütün bunlar onun şəxsi keyfiyyətlərinin necəliyindən xəbər verir. Son dövrlər aktivləşib, hətta Prezident İlham Əliyevin haqqında da ağır ittihamlar irəli sürür. Deyir ki, Prezident xalqı hara aparır?! Başa düşmür ki, müzəffər Ali Baş Komandan İlham Əliyev Qarabağı bütövlükdə erməni işğalından azad edib. O, özü müdafiə naziri olub xırda bir ərazi azad etmək istəyirdi. Bu, çox gülüncdür. Ümumiyyətlə özünü Prezident İlham Əliyevlə müqayisə etməsi çox gülməlidir, parodiyadır. Elə bilir ki, müdafiə naziri və yaxud da prezident olmaq asan məsələdir. Hamını, hər şeyi təhqir edir. Prezident olmaq üçün gərək beynəlxalq təşkilatlarla əlaqələr qurasan, nüfuzun arta, sənə qiymət verələr və sözün keçərli ola. Sən özünü kiminlə müqayisə edirsən?! Elə bilir ki, guya bu dəyərli adamdır".

Deputat qeyd edib ki, saxta yolla deputat seçilməsi barədə Əli Əliyevin səsləndirdiyi fikirlər həqiqəti əks etdirmir: "Seçkilərdə kifayət qədər səs toplamışam, kimsə məndən çox səs toplamayıb ki, saxta yola əl atım. Əgər məni xalq sevib və dövlət də parlamentdə təmsil olunmağıma razıdırsa, burda saxta olan nədir? Doğrudan da, saxtadırsa, niyə özü də seçkilərdə iştirak edirdi? Seçkilər zamanı yastı-yastı danışırdı, istəyirdi ki, parlamentə düşə bilsin. İndi alınmayıb deyə hər cür təhqirlər edir. Deyir, Tahir kimisi yüzlərlə idi, Əbülfəz Elçibəy onu təyin etdi və s. Xeyr, Tahir Kərimlidən bir dənə idi ki, Xalq hərakatına qoşulub Mixail Qorbaçova ölüm hökmü çıxarırdı. Hətta Əbülfəz Elçibəy məni yox, başqasını təyin etmək istəyəndə, ona dedilər ki, ayıbdır. Mən heç vaxt nə Elçibəyçi, nə də Rəsulzadəçi olmuşam. Hələ o vaxt İsa Qəmbər mənə Əbülfəz bəyin arxasıyca gedək deyəndə, mən dedim ki, bayrağının arxasınca gedirəm. Əbülfəz bəy o bayrağı əlində aparırsa, aparsın. Heç zaman ideologiyama, əqidəmə xain çıxmamışam. Əslində, mən indi Əli Əliyevə cavab verməklə onu dəyərə mindirdim. Özünü bir nömrəli siyasi lider hesab edir. Rəylərdə də qeyd edirlər ki, siz prezident olmağa layiqsiniz, onun da qoltuğu qarpızlanır. Sən özünü nə hesab edirsən, kimlə müqayisə edirsən?! Ən cəsarətli fikirləri cənab Prezident İlham Əliyev səsləndirib. İlham Əliyevdən başqa kim deyib ki, İrəvan Azərbaycanındır, Zəngəzur Azərbaycanındır?! Heç kim. İndi niyə belə cığallıq edirsən?"