Çapar.info: - "Təbii ki, bu gün hamımızın fikri qardaş Türkiyədə baş verən yanğın hadisəsindədir. Şükür Allaha ki, yanğınların qarşısı müəyyən qədər alınıb”

Bunu Moderator.az-a açıqlamasında Əməkdar artist Təyyar Bayramov deyib:

“Bizim ölkəmiz də belə gündə öz qardaşını tək qoymadı. Yanğınsöndürənlərimiz orda böyük fədakarlıq göstərirlər. Elə Kamil Dünyamalıyevin yanan evdən türk bayrağını xilas etməsi hamımızı qürurlandırdı. Necə ki, qardaş ölkəmiz bizim yanımızdadır, bu gün biz də onların yanındayıq. Biz “bir millət, iki millətik”. Bütün bunlar adamı çox qürurlandırır”.

Əməkdar artist Qəbədələdə baş tutan Zəfər konsertlərindən də danışıb:

“Qəbələ şəhərində on ikinci musiqi festivalı baş tutdu. Artıq bu festival neçə illərdir baş tutur. Ustadım Mənsum İbrahimovun rəhbərliyi ilə “Qarabağ instrumental ansamblı” və musiqiçilər Xalq artisti Elçin Həşimov, Əməkdar artist Elnur Əhmədov və birgə çalışdığımız Günay İmamverdiyeva və Gülzar Fərəcova iştirak etdi. Mənsum müəllimin rəhbərliyi ilə tələbəriylə birlikdə bu konsert təşkil olundu. Orda elə kompozisiya hazırlamışdıq ki, bir saat davam etdi. Sonda qazilərimizin istəyi ilə “Qarabağ şikəstəsi” və “Xudayar təsnifi”ni ifa etdik.

T.Bayramov son zamanlar təxribata əl atan mənfur düşmənlərimizin heç vaxt istəklərinə nail olmayacaqlarını bildirib:

“Düşmənə bizim müzəffər Ali Baş Komandanımız, ordumuz sözünü dedi və bir devizimiz var ki, “Qarabağ Azərbaycandır!”. İnşallah vaxtilə ermənilərə verilən torpaqlarımız qarış-qarış bizim olacaq. Dövlətimiz bu istiqamətdə çox uğurlu siyasət yürüdür və müsbət nəticəsini də görəcəyik. Ermənilər onsuz da hər zaman təxribatçı olublar. Onların bizim dediyimizlə razılaşmaqdan başqa yolları yoxdur. 44 günlük Vətən savaşında nəinki şəhid atamın, bütün şəhidlərimizin, Xocalıda həlak olan körpələrimizin, qocalarımızın qisası alındı”.