Çapar.info: - "Həyata doymağımın, bezməyin ən son nöqtəsi intihar etməyim idi".

Bu sözləri bir neçə gün öncə canlı yayımda intihara cəhd edən qazi Bəhram Nuriyev Cebhe. info-ya açıqlmasında deyib.

Qazi: "Hamı mənim üçün narahat olub. Çox sağ olsunlar.! Sənədlərimi xəstəxanaya təqdim etmişəm. Çox güman ki, müalicə alacağam. Mənə deyirdilər ki, ora getmə, dəlixanadır, sənə iynə vuracaqlar. Haqsızlıqlara dözmürəm.

Heç ümidim yox idi ki, sağ qalaram. Elə problemlər olur ki, insan onu içində saxlaya bilmir. Bir müddət sonra partlayırsan. Başıma gələn problemləri sosial şəbəkələrdə paylaşmaqla rahatlıq tapıram".

Qazi intihar vaxtı düşündüklərini bölüşərkən "Yolun qırağında idim, gördüm ölmürəm. Fikirləşdim ki, özümü bəlkə maşının altına atım? Sonra düşündüm ki, bəlkə maşını idarə edən adam kasıbdır, mənə görə işə düşməsin. Daha sonra gördüm ki, halım yoxdur. Huşumu itirib yerdə qalmışam. Həmin vaxt məni tapıblar"- deyib.

Qeyd edək ki, DİN intihar günü təxirəsalınmaz tədbirlər çərçivəsində Bəhram Nuriyevin yeri müəyyən edib. Daha sonra B.Nuriyev polis əməkdaşları tərəfindən xəstəxanaya yerləşdirilib. Xatırladaq ki, B.Nuriyev bir neçə gün öncə özünün feysbuk səhifəsində açdığı canlı yayımda damarlarını kəsib. O, səhhətində yaranan problemlə bağlı aidiyyəti qurumların doğru rəy vermədiyini, psixiatriya xəstəxanasına yerləşdirilməsi ilə bağlı qərarın ədalətsizlik olduğunu bildirib.