Azərbaycanın Vətən müharibəsi xalqımızın parlaq qələbəsi ilə yekunlaşdı. Uzun illərdir düşmən tapdağı altında qalan əzəli və əbədi torpaqlarımız işğaldan azad edildi. Eyni zamanda, azadlıq savaşı cənab Prezidentin təkrarsız diplomatik məharəti ilə yanaşı, həm də yenilməz sərkərdəlik qabiliyyətlərini bütün dünyaya göstərdi. Dövlət başçımızın siyasi iradəsi, öz xalqına sədaqəti və düşmənə qarşı yenilməzliyi Azərbaycanın beynəlxalq nüfuzunu daha da yüksəltdi.
Bunu SƏS Media Qrupunun rəhbəri, siyasi ekspert Bəhruz Quliyev deyib.
Siyasi ekspertin sözlərinə görə, xalq Prezidenti, Ali Baş Komandanı "Azərbaycanın Milli Qəhrəmanı", "Vətən müharibəsi qəhrəmanı" kimi görmək istəyir: “Məhz cənab İlham Əliyevin uzaqgörən siyasəti nəticəsində Qarabağ torpaqları düşmən işğalından azad edildi. 44 günlük müharibə bütün dünyaya dövlət başçısının necə praqmatik düşüncəli, müdrik siyasi xadim, diplomat və güclü sərkərdə olduğunu bir daha göstərdi. Prezident İlham Əliyev Ulu öndərimiz Heydər Əliyevin layiqli davamçısı olaraq Onun vəsiyyətini yerinə yetirdi.
Hesab edirəm ki, xalqın təşəbbüsü ilə dövlət tərəfindən müharibəni qələbə ilə tamamlayan ordunun müzəffər Ali Baş Komandanı İlham Əliyevə "Azərbaycanın Milli Qəhrəmanı", “Vətən müharibəsi qəhrəmanı” adı verilməlidir. Hətta deyərdim ki, Azərbaycan dövləti tərəfindən “Xalq Qəhrəmanı” xüsusi mükafatı təsis olunmalıdır və bu ada Azərbaycan xalqı və dövləti qarşısında müstəsna xidmətlərinə görə ilk olaraq da cənab İlham Əliyev layiq görülməlidir. Çünki dövlət başçısı bu xüsusi mükafata layiq olan şəxsiyyətdir. Xalq tərəfindən cənab Prezidentə istər pandemiya dövründə olsun, istərsə də 44 günlük Vətən müharibəsi dövründə saysız-hesabsız müraciətlər gəlirdi və gəlməkdədir, hər bir müraciətdə də ölkə başçısının gördüyü işlər təqdirəlayiq hal kimi qiymətləndirilir. Bunların hər biri göstərir ki, xalq Prezidentinə etimad edir və Onu öz Lideri, Qəhrəmanı kimi görür.
Cənab İlham Əliyev həm də güclü sərkərdədir. Çünki sərkərdəlik yalnız və yalnız müharibə dönəmində özünü göstərir. Vətən müharibəsi dövründə bütün döyüş tapşırıqları, taktiki gedişlər bilavasitə Ali Baş Komandanın tapşırığı və göstərişi ilə həyata keçirilirdi. Ulu öndər Heydər Əliyevin müstəqilliyimizin ilk illərindən başladığı ordu quruculuğu prosesinin artıq hansı səviyyəyə gəlib çatdığını, cənab Ali Baş Komandanın iradəsi, mətinliyi sayəsində Milli Ordumuzun necə yüksək döyüş qabiliyyətinə malik olduğunu bütün dünya Vətən müharibəsində bir daha gördü. Onun diplomatiya səngərlərində, müasir dünyamızın qlobal siyasi-iqtisadi prosesləri müstəvisində zəka silahı ilə qazandığı zəfərlər isə bundan daha böyükdür”.
B.Quliyev əlavə edib ki, Prezident İlham Əliyev 2003-cü ildə qarşıya qoyduğu və bəyan etdiyi strateji hədəflərə nail olunması üçün istər beynəlxalq miqyasda, istərsə də ölkə daxilində məqsədyönlü, ardıcıl, düşünülmüş siyasət həyata keçirdi və “güclü dövlət” konsepsiyasını reallaşdırmağa nail oldu: “İlham Əliyev öz xalqını ürəkdən sevən, onun xoşbəxt gələcəyini düşünən və xalqı üçün misilsiz xidmətlər göstərən tarixi şəxslər sırasına öz adını böyük hərflərlə yazdı. Cənab İlham Əliyev Öz liderlik keyfiyyətləri ilə XXI əsrin siyasi liderinin mükəmməl portretini yaradır, yeni minilliyin başlanğıcında bu statusun dəyər və meyarlarını formalaşdırır. Bir tərəfdən klassik liderlik konsepsiyası, digər tərəfdən də müasir liderlərə münasibətdə irəli sürülən və ya təbii olaraq meydana çıxan tələblər prizmasından yanaşmaqla O, əsl liderin bütün keyfiyyətlərini özünün mənəvi və siyasi simasında təcəssüm etdirə bilir. İlham Əliyev bütün dünyada çox az təsadüf edilən liderlərdəndir ki, cəmiyyət can atdığı, özünə rəhbər seçdiyi şəxsiyyətdə görmək istədiyi bir çox cəhətləri həm mənəvi-siyasi lider, həm güclü sərkərdə, həm mahir diplomat, həm bacarıqlı idarəçi, həm qurucu rəhbər obrazlarını Onun siyasi portretində tapa bilir”.